உறவுகள்- ஒரு உண்மை!!

அசையும் அம்பரத்தில்

உறவுகள் எனும் பம்பரத்தைச்

சுழற்றி விளையாடும்

மானுடப் பிரவாகங்களே!

இருக்கும் நிலையை

இழந்து தவிக்கும்

உறவு முடிச்சுகள்

முடித்த உலகம் இது!

முடிந்து போன அத்யாயதிற்கு

முன்னுரை எழுதி பிள்ளையார்சுழி

போட முன்வரும் உறவுகள் ,

கண்ணெதிரே வரும் கண்ணீருக்கு

முற்றுப்புள்ளி வைக்கப் பின்தங்கிப்

போகும் அவலம்!

என்றோ ஒரு நாள்

யாரோ இட்டச் சாபம்

இன்று பணக்கட்டுகளில்

புதைத்து வைத்துள்ளது ,

மனித ஆன்மாக்களை....

தட்டிக்கேட்கும் தருணத்தில்

எல்லாம் ,

கழற்றும் சட்டையென

கழன்ற மனிதநேயம்

சாயம் போய்க்கொண்டிருக்கின்றது !

அற்ற குளத்தின் அறுநீர்ப் பறவைகளாய்

சுற்றித் திரியும் உறவுகள்

சூழ்ந்த இப்புவியில் ,

குளம் வற்ற நானும் வாடுகிறேன்

என்று குமுறும் ஆம்பல்கள்

இன்றும் தென்படவில்லை

எம் கண்களில்.....

மனமே உணர்ந்திடு !

உறவுகள் அனைத்தும்

தொடர்கதைகளல்ல!

சிட்டாய்ப் பறக்கும்

சின்னஞ்சிறு கதைகளே !